Bu gün Aşura günüdür. Bu gün Kərbəla şəhidləri ilə yanaşı, 20 Yanvar, Qarabağ uğrunda döyüşlərdə şəhid olanlar da yad ediləcək. Məscidlərdə bu münasibətlə qanvermə aksiyası keçiriləcək. Bu barədə ölkə axundlarının Göy Məsciddə keçirilən toplantısında qərar qəbul edilib. Qafqaz Müsəlmanları İdarəsinin Qazilər Şurasının bununla əlaqədar hazırladığı fitva axundların nəzərinə çatdırılıb. Fitvada bu günlərdə ehtiyacı olanlara qan verilməsinin ən münasib təziyədarlıq olduğu qeyd edilib.

Bu gün azərbaycanlı zəvvarların ilk qrupu Həcc ziyarətinə yola düşür. Qafqaz Müsəlmanları İdarəsindən ANS TV-yə verilən məlumata görə, zəvvarların ilk qrupu bu gün axşam saat 23:00-da Azadlıq meydanından yola salınacaq.

Bu il Azərbaycandan 5000-ə yaxın zəvvar müqəddəs torpaqları ziyarət edəcək. Bu barədə ANS TV-yə Qafqaz Müsəlmanları İdarəsindən (QMİ) məlumat verilib.

Məlumata görə, QMİ onların səfəri üçün bütün hazırlıqları başa çatdırıb. Qafqaz Müsəlmanları İdarəsi sədrinin 1-ci müavini Hacı Salman Musayevin sözlərinə görə, zəvvarlar ziyarətə həmişəki kimi həm avtobus, həm də təyyarə ilə yola düşəcəklər. Avtobusla gedənlər ölkəni dekabrın 2-dən 5-nə, təyyarə ilə isə dekabrın 9-dan 13-nə kimi tərk edəcək. Ümumiyyətlə isə ziyarət müddəti 18 gündür.